qaasid e khush faal laayaa us ke aane ki khabar
— Hasrat Azimabadi
Qaasid-e-khush-faal laayaa us ke aane kee khabar
Dil to khush kartaa hai baare ye bahaane kee khabar
Wo but-e-be-raham ham se yuun judaa.ee kar gaya
Haa.e kis kaafir ko thee is bad zamaane kee khabar
Bulbulo do din ghaneemat hai ye fursat aish kee
Baagh se hai aaj kal hee gul ke jaane kee khabar
Taa-abad khaalee rahe yaa-rab dilon men us kee jaa
Jo koi laave mire ghar us ke aane kee khabar
Mere dil ko nisbat-e-farhaad-o-majnoon aar hai
Duur ho mujh ko nahin hai is divaane kee khabar
Kaun kis kee ishq ke zindaan men gham-khvaaree kare
Khoon-e-dil letaa hai mere piine khaane kee khabar
Aa gaya naadaan too us ke fareb-e-lutf men
Mujh ko 'hasrat' sab thee us ke dil lubhaane kee khabar