rakhaa paa jahaan men nagaaraa zameen par

Rakhaa paa jahaan men nagaaraa zameen par Bahut sar ko vaan ham ne maaraa zameen par Junoon josh maare hai deevaar-o-dar se Huaa kis paree kaa guzaaraa zameen par Nahin hai ye aah-e-falak saa ki ham ne Alam shor-e-sauda kaa gaaDhaa zameen par Qadam jis jagah rakkhaa us sang-dil ne Na ho vaan ba-juz sang-e-khaaraa zameen par Nazar se tiree jis ne ham ko giraayaa Falak se uThaa kar ke maaraa zameen par Too roo-e-zameen dekh le sair ho kar Na hogaa guzar phir dobaaraa zameen par Tire naqsh-e-paa ko kahe apna ham-sar Nahin hai ye munh to hamaaraa zameen par Wo zohra-jabeen mehrbaan hove 'hasrat' Kahaan hai ye apna sitaaraa zameen par