aur bhi ho gae begaana wo gaflat kar ke

Aur bhee ho ga.e begaana wo ghaflat kar ke Aazmaayaa jo unhen zabt-e-mohabbat kar ke Dil ne chhoDaa hai na chhoDe tire milne kaa khayaal Baar-haa dekh liyaa ham ne malaamat kar ke Dekhne aa.e the wo apnee mohabbat kaa asar Kahne ko ye hai ki aa.e hain 'ayaadat kar ke Pasti-e-hausla-e-shauq kee ab hai ye salaah Baith rahiye gham-e-hijraan pe qanaa'at kar ke Dil ne paayaa hai mohabbat kaa ye 'aalee rutba Aap ke dard-e-davaa-kaar kee khidmat kar ke Ruuh ne paa.ee hai takleef-e-judaa.ee se najaat Aap kee yaad ko sarmaaya-e-raahat kar ke ChheD se ab wo ye kahte hain ki sanbhlo 'hasrat' Sabr o taab-e-dil-e-beemaar ko ghaarat kar ke