aur to paas mire hijr men kya rakkhaa hai
— Hasrat Mohani
Aur to paas mire hijr men kya rakkhaa hai
Ik tire dard ko pahloo men chhupaa rakkhaa hai
Dil se arbaab-e-wafa kaa hai bhulaanaa mushkil
Ham ne ye un ke taghaaful ko sunaa rakkhaa hai
Tum ne baal apne jo phoolon men basaa rakkhe hain
Shauq ko aur bhee deevaana banaa rakkhaa hai
Sakht bedard hai taaseer-e-mohabbat ki unhen
Bistar-e-naaz pe sote se jagaa rakkhaa hai
Aah wo yaad ki us yaad ko ho kar majboor
Dil-e-maayoos ne muddat se bhulaa rakkhaa hai
Kya ta.ammul hai mire qatl men ai baazoo-e-yaar
Ek hee vaar men sar tan se judaa rakkhaa hai
Husn ko jaur se begaana na samjho ki use
Ye sabaq ishq ne pahle hee paDhaa rakkhaa hai
Teree nisbat se sitamgar tire maayooson ne
Daagh-e-hirmaan ko bhee siine se lagaa rakkhaa hai
Kahte hain ahl-e-jahaan dard-e-mohabbat jis ko
Naam usee kaa dil-e-muztar ne davaa rakkhaa hai
Nigah-e-yaar se paikaan-e-qazaa kaa mushtaaq
Dil-e-majboor nishaane pe khulaa rakkhaa hai
Is kaa anjaam bhee Kuch soch liyaa hai 'hasrat'
Too ne rabt un se jo is darja baDhaa rakkhaa hai