barkaten sab hain ayaan daulat e ruuhaanii ki
— Hasrat Mohani
Barkaten sab hain ayaan daulat-e-roohaanee kee
Vaah kya baat hai us chehra-e-nooraanee kee
Shauq dekhe tujhe kis aankh se ai mehr-e-jamaal
Kuch nihaayat hee naheen teree darakhshaanee kee
Mujh se wo sag bhee hai afzal jise izzat ho naseeb
Aastaan-e-haram-e-yaar pe darbaanee kee
Jab sunaa yaad kiyaa karte ho tum bhee to mujhe
Kya kahoon had na rahee Kuch miree hairaanee kee
Sa.i-e-ahbaab ko naahaq hai rihaa.ee kaa khayaal
Aur hee Kuch hai tamannaa tire zindaanee kee
Wo tabassum bhee qayaamat hai tiraa baad-e-jafaa
Too ne dee ho jise khidmat namak-afshaanee kee
Mushkilon se jo muqaabil huee himmat meree
Qadr baaqee na rahee aish-e-tan-aasaanee kee
Rah gaya jal ke tiree bazm men parvaana jo raat
Kheench ga.ee shakl miree sokhta-saamaanee kee
Rashk-e-shaahee ho na kyuun apnee faqeeree 'hasrat'
Kab se karte hain ghulaamee shah-e-jeelaanee kee