chaahat mirii chaahat hi nahin aap ke nazdiik
— Hasrat Mohani
Chaahat miree chaahat hee naheen aap ke nazdeek
Kuch meree haqeeqat hee naheen aap ke nazdeek
Kuch qadr to karte mire iz.haar wafa kee
Shaayad ye mohabbat hee naheen aap ke nazdeek
Yuun ghair se bebaak ishaare sar-e-mahfil
Kya ye miree zillat hee naheen aap ke nazdeek
Ushshaaq pe Kuch had bhee muqarrar hai sitam kee
Yaa us kee nihaayat hee naheen aap ke nazdeek
Aglee see na raaten hain na ghaaten hain na baaten
Kya ab main wo 'hasrat' hee naheen aap ke nazdeek