dard e dil ki unhen khabar na huii
— Hasrat Mohani
Dard-e-dil kee unhen khabar na huee
Koi tadbeer kaargar na huee
Koshishen ham ne kiin hazaar magar
Ishq men ek mo'tabar na huee
Kar chuke ham ko be-gunaah shaheed
Aap kee aankh phir bhee tar na huee
Naa-rasaa aah-e-aashiqaan wo kahaan
Duur un se jo be-asar na huee
Aa.ee bujhne ko apnee sham-e-hayaat
Shab-e-gham kee magar sahar na huee
Shab the ham garm-e-naala-haa-e-firaaq
Sub.h ik aah-e-sard sar na huee
Tum se kyoonkar wo chhup sake 'hasrat'
Nigah-e-shauq parda dar na huee