husn e be parvaa ko khud biin o khud aaraa kar diyaa

Husn-e-be-parvaa ko khud-been o khud-aaraa kar diyaa Kya kiyaa main ne ki iz.haar-e-tamannaa kar diyaa BaDh ga.iin tum se to mil kar aur bhee betaabiyaan Ham ye samjhe the ki ab dil ko shakebaa kar diyaa PaDh ke teraa khat mire dil kee ajab haalat huee Iztiraab-e-shauq ne ik hashr barpaa kar diyaa Ham rahe yaan tak tiree khidmat men sargarm-e-niyaaz Tujh ko aakhir aashnaa-e-naaz-e-bejaa kar diyaa Ab nahin dil ko kisee soorat kisee pahloo qaraar Us nigaah-e-naaz ne kya sehr aisa kar diyaa Ishq se tere baDhe kya kya dilon ke martabe Mehr zarron ko kiyaa qatron ko Dariya kar diyaa Kyuun na ho teree mohabbat se munavvar jaan o dil Sham.a jab raushan huee ghar men ujaalaa kar diyaa Teree mahfil se uThaataa ghair mujh ko kya majaal Dekhtaa thaa main ki too ne bhee ishaara kar diyaa Sab ghalat kahte the lutf-e-yaar ko vaj.h-e-sukoon Dard-e-dil us ne to 'hasrat' aur duunaa kar diyaa