jo wo nazar basar e lutf aam ho jaae

Jo wo nazar basar-e-lutf aam ho jaa.e Ajab nahin ki hamaaraa bhee kaam ho jaa.e Sharaab-e-shauq kee qeemat hai naqd-e-jaan-e-azeez Agar ye baa.is-e-kaif-e-davaam ho jaa.e Raheen-e-yaas rahen ahl-e-aarzoo kab tak Kabhi to aap kaa darbaar aam ho jaa.e Jo aur Kuch ho tiree diid ke sivaa manzoor To mujh pe khwaish-e-jannat haraam ho jaa.e Wo duur hee se hamen dekh len yahee hai bahut Magar qubool hamaaraa salaam ho jaa.e Agar wo husn-e-dil-aaraa kabhi ho jalva farosh Farogh-e-noor men gum zarf-e-baam ho jaa.e Sunaa hai bar-sar-e-bakhshish hai aaj piir mughaan Hamen bhee kaash ataa koi jaam ho jaa.e Tire karam pe hai mauqoof kaamraani-e-shauq Ye naa-tamaam ilaahee tamaam ho jaa.e Sitam ke baad karam hai jafaa ke baad ataa Hamen hai bas jo yahee iltizaam ho jaa.e Ataa ho soz wo yaa rab junoon-e-'hasrat' ko Ki jis se pukhta ye sauda-e-khaam ho jaa.e