khuu samajh men nahin aatii tire diivaanon ki

Khoo samajh men nahin aatee tire deevaanon kee Daamanon kee na khabar hai na girebaanon kee Jalva-e-saaghar-o-meenaa hai jo ham-rang-e-bahaar Raunaqen turfa taraqqee pe hain mai-khaanon kee Har taraf be-khudee o be-khabaree kee hai numood Qaabil-e-deed hai Dunya tire hairaanon kee Sahl is se to yahee hai ki sambhaalen dil ko Minnaten kaun kare aap ke darbaanon kee Aankh vaale tiree soorat pe miTe jaate hain Sham-e-mahfil kee taraf bhiiD hai parvaanon kee Ai jafaakaar tire ahd se pahle to na thee Kasrat is darja mohabbat ke pasheemaanon kee Raaz-e-gham se hamen aagaah kiyaa khuub kiyaa Kuch nihaayat hee nahin aap ke ehsaanon kee Dushman-e-ahl-e-muravvat hai wo begaana-e-uns Shakl pariyon kee hai khoo bhee nahin insaanon kee Hamrah-e-ghair mubaarak unhen gul-gasht-e-chaman Sair ham ko bhee mayassar hai bayaabaanon kee Ik bakheDaa hai nazar men sar-o-saamaan-e-vajood Ab ye haalat hai tire sokhta-saamaanon kee Faiz-e-saaqee kee ajab dhuum hai mai-khaanon men Har taraf mai kee talab maang hai paimaanon kee Aashiqon hee kaa jigar hai ki hain khursand-e-jafaa Kaafiron kee hai ye himmat na musalmaanon kee Yaad phir taaza huee haal se tere 'hasrat' Qais o farhaad ke guzre hue afsaanon kee