muqarrar Kuch na Kuch is men raqiibon ki bhi saazish hai

Muqarrar Kuch na Kuch is men raqeebon kee bhee saazish hai Wo be-parvaa ilaahee mujh pe kyuun garm-e-navaazish hai Pa-e-mashq-e-taghaaful aap ne makhsoos Thahraayaa Hamen ye baat bhee min-jumala-e-asbaab naazish hai MiTaa de khud hamen gar shikva-e-gham miT naheen saktaa Jafaa-e-yaar se ye aakhiree apnee guzaarish hai Kahaan mumkin kisee ko baaryaabee un kee mahfil men Na itmeenaan-e-koshish hai na ummeed-e-sifaarish hai Nihaan hai dil pazeeree jis ke har har lafz-e-sheereen men Ye kis jaan-e-wafa ke haath kee rangeen nigaarish hai Kiyaa thaa ek din dil ne jo daava-e-shakebaa.ee So ab tak un ke naaz-e-dilbaree ko ham se kaavish hai Hujoom-e-yaas ne be-dil kiyaa aisa ki 'hasrat' ko Tire aane kee ab ummeed baaqee hai na khvaahish hai