nigaah e yaar jise aashnaa e raaz kare

Nigaah-e-yaar jise aashnaa-e-raaz kare Wo apnee khoobi-e-qismat pe kyuun na naaz kare Dilon ko fikr-e-do-aalam se kar diyaa aazaad Tire junoon kaa khuda silsila daraaz kare Khirad kaa naam junoon paD gaya junoon kaa khirad Jo chaahe aap kaa husn-e-karishma-saaz kare Tire sitam se main khush hoon ki ghaaliban yuun bhee Mujhe wo shaamil-e-arbaab-e-imtiyaaz kare Gham-e-jahaan se jise ho faraagh kee khvaahish Wo un ke dard-e-mohabbat se saaz-baaz kare Ummeed-vaar hain har samt aashiqon ke giroh Tiree nigaah ko allaah dil-navaaz kare Tire karam kaa sazaa-vaar to naheen 'hasrat' Ab aage teree khushee hai jo sarfaraaz kare