phir bhi hai tum ko masiihaaii kaa daavaa dekho

Phir bhee hai tum ko maseehaa.ee kaa da.avaa dekho Mujh ko dekho mire marne kee tamanna dekho Ham na kahte the banaavaT hai ye sara ghussa Hans ke lo phir wo unhon ne hamen dekhaa dekho Ghar se har-vaqt nikal aate ho khole hue baal Shaam dekho na miree jaan saveraa dekho Mahfil-e-ghair men be-parda tumhen dekh liyaa Ab kabhi ham se khabar-daar na chhupnaa dekho Khaana-e-jaan men numoodaar hai ik paikar-e-noor Hasrato aao rukh-e-yaar kaa jalva dekho Dil ko rangeenee-e-khwaish kee khataa par aakhir Miltee hai us gul-e-ra.anaa se sazaa kya dekho Saamne sab ke munaasib nahin ham par ye itaab Sar se Dhal jaa.e na ghusse men dupaTTa dekho Mar-miTe ham to kabhi yaad bhee tum ne na kiyaa Ab mohabbat kaa na karnaa kabhi da.avaa dekho Sar kaheen baal kaheen haath kaheen paanv kaheen Un kaa sonaa bhee hai kis shaan kaa sonaa dekho Ab wo shokhee se ye kahte hain sitamgar hain jo ham Dil kisee aur se Kuch roz ko bahlaa dekho Vaa.izo munh men tumhaare bhee bhar aa.e paanee Mai-e-rangeen kaa jo saaghar se chhalaknaa dekho Baat kya hai jo hue jaate ho tum yoonhee khafaa Mujh ko dekho na mire dil kaa dhDaknaa dekho Jurm-e-nazzaara pe kaun itnee khushaamad kartaa Ab wo rooThe hain lo aur tamaashaa dekho Mastee-e-husn se apnee bhee nahin tum ko khabar Kya suno arz miree haal miraa kya dekho Dosto tark-e-mohabbat kee naseehat hai fuzool Aur na maano to dil-e-zaar ko samjhaa dekho Havas-e-deed miTee hai na miTegee 'hasrat' Dekhne ke liye chaaho unhen jitnaa dekho