raushan jamaal e yaar se hai anjuman tamaam

Raushan jamaal-e-yaar se hai anjuman tamaam Dahkaa huaa hai aatish-e-gul se chaman tamaam Hairat ghuroor-e-husn se shokhee se iztiraab Dil ne bhee tere siikh liye hain chalan tamaam Allaah-ree jism-e-yaar kee khoobee ki khud-ba-khud Rangeeniyon men Doob gaya pairahan tamaam Dil Khoon ho chukaa hai jigar ho chukaa hai khaak Baaqee hoon main mujhe bhee kar ai tegh-zan tamaam Dekho to chashm-e-yaar kee jaadoo-nigaahiyaan Behosh ik nazar men huee anjuman tamaam Hai naaz-e-husn se jo farozaan jabeen-e-yaar Labrez aab-e-noor hai chaah-e-zaqan tamaam Nashv-o-numaa-e-sabza-o-gul se bahaar men Shaadaabiyon ne gher liyaa hai chaman tamaam Us naazneen ne jab se kiyaa hai vahaan qayaam Gulzaar ban ga.ee hai zameen-e-dakan tamaam Achchhaa hai ahl-e-jaur kiye jaa.en sakhtiyaan Phailegee yuun hee shorish-e-hubb-e-vatan tamaam Samjhe hain ahl-e-sharq ko shaayad qareeb-e-marg Maghrib ke yuun hain jam.a ye zaagh o zaghan tamaam Sheereeni-e-naseem hai soz-o-gudaaz-e-'meer' 'hasrat' tire sukhan pe hai lutf-e-sukhan tamaam