rog dil ko lagaa gaiin aankhen
— Hasrat Mohani
Rog dil ko lagaa ga.iin aankhen
Ik tamaashaa dikhaa ga.iin aankhen
Mil ke un kee nigaah-e-jaadoo se
Dil ko hairaan banaa ga.iin aankhen
Mujh ko dikhlaa ke raah-e-koocha-yaar
Kis ghazab men phansaa ga.iin aankhen
Us ne dekhaa thaa kis nazar se mujhe
Dil men goyaa samaa ga.iin aankhen
Mahfil-e-yaar men ba-zauq-e-nigaah
Lutf kya kya uThaa ga.iin aankhen
Haal sunte wo kya miraa 'hasrat'
Wo to kahiye sunaa ga.iin aankhen