siyahkaar the baa safaa ho gae ham

Siyahkaar the baa-safaa ho ga.e ham Tire ishq men kya se kya ho ga.e ham Na jaanaa ki shauq aur bhaDkegaa meraa Wo samjhe ki us se judaa ho ga.e ham Dam-e-vaapseen aa.e pursish ko naahaq Bas ab jaao tum se khafaa ho ga.e ham Hue mahv kis kee tamannaa men aise Ki mustaghni-e-maa-sivaa ho ga.e ham Unhen ranj ab kyuun huaa ham to khush hain Ki mar kar shaheed-e-wafa ho ga.e ham Jab un se adab ne na Kuch munh se maangaa To ik paikar-e-iltijaa ho ga.e ham Tiree fikr kaa mubtilaa ho gaya dil Magar qaid-e-gham se rihaa ho ga.e ham Fanaa ho ke raah-e-mohabbat men 'hasrat' Sazaa-vaar-e-khuld-e-baqaa ho ga.e ham