taasiir e barq e husn jo un ke sukhan men thii

Taaseer-e-barq-e-husn jo un ke sukhan men thee Ik larzish-e-khafee mire saare badan men thee Vaan se nikal ke phir na faraaghat huee naseeb Aasoodgee kee jaan tiree anjuman men thee Ik rang-e-iltifaat bhee us be-rukhee men thaa Ik saadgee bhee us nigah-e-sahar fan men thee Mohtaaj-e-boo-e-itr na thaa jism-e-khoob-e-yaar Khushbu-e-dilbaree thee jo us pairahan men thee Kuch dil hee bujh gaya hai miraa varna aaj kal Kaifiyat-e-bahaar kee shiddat chaman men thee Maaloom ho ga.ee mire dil ko raah-e-shauq Wo baat pyaar kee jo hunooz us dahan men thee Ghurbat kee sub.h men bhee naheen hai wo raushnee Jo raushnee ki shaam-e-savaad-e-vatan men thee Aish gudaaz-e-dil bhee gham-e-aashiqee men thaa Ik raahat-e-lateef bhee zimn-e-mehan men thee Achchhaa huaa ki khaatir-e-'hasrat' se haT ga.ee Haibat see ik jo khatra-e-daar-o-rasan men thee