tujh se garviida yak zamaana raha

Tujh se girveeda yak zamaana raha Kuchh faqat main hee mubtalaa na raha Aap ko ab huee hai qadr-e-wafa Jab ki main laa.iq-e-jafaa na raha Raah-o-rasm-e-wafa wo bhuul ga.e Ab hamen bhee koee gila na raha Husn khud ho gaya ghareeb-navaaz Ishq muhtaaj-e-iltejaa na raha Bas-ki nazzaara-soz thaa wo jamaal Hosh-e-nazzaargee bajaa na raha Main kabhee tujh se bad-gumaan na huaa Too kabhee mujh se aashnaa na raha Aap kaa shauq bhee to ab dil men Aap kee yaad ke sivaa na raha Aur bhee ho ga.e wo ghaafil-e-khvaab Naala-e-sub.h-e-naa-rasaa na raha Husn kaa naaz aashiqee kaa niyaaz Ab to kuchh bhee wo maajraa na raha Ishq jab shikva sanj-e-husn huaa Iltijaa ho ga.ee gila na raha Ham bharose pe un ke baith rahe Jab kisee kaa bhee aasraa na raha Mere gham kee huee unhen bhee khabar Ab to ye dard laa-davaa na raha Aarzoo teree barqaraar rahe Dil kaa kya hai raha raha na raha Ho ga.e khatm mujh pe jaur-e-falak Ab koee morid-e-balaa na raha Jab se dekhee abul-kalaam kee nasr Nazm-e-'hasrat' men bhee mazaa na raha