vasl ki bantii hain in baaton se tadbiiren kahiin
— Hasrat Mohani
Vasl kee bantee hain in baaton se tadbeeren kaheen
Aarzooon se phiraa kartee hain taqdeeren kaheen
Be-zabaanee tarjumaan-e-shauq behad ho to ho
Varna pesh-e-yaar kaam aatee hain taqreeren kaheen
MiT rahee hain dil se yaaden rozgaar-e-aish kee
Ab nazar kaahe ko aa.engee ye tasveeren kaheen
Iltifaat-e-yaar thaa ik khvaab-e-aaghaaz-e-wafa
Sach huaa kartee hain in khawabon kee ta.abeeren kaheen
Teree be-sabree hai 'hasrat' khaam-kaaree kee daleel
Girya-e-ushshaaq men hotee hain taaseeren kaheen