yuun to aashiq tiraa zamaana huaa
— Hasrat Mohani
Yuun to aashiq tiraa zamaana huaa
Mujh saa jaan-baaz doosraa na huaa
Khud-ba-khud boo-e-yaar phail ga.ee
Koi minnat-kash-e-sabaa na huaa
Main giraftaar-e-ulfat-e-sayyaad
Daam se chhuT ke bhee rihaa na huaa
Khabar us be-khabar kee laa detee
Tujh se itnaa bhee ai sabaa na huaa
Un se arz-e-karam to kya karte
Ham se khud shikva-e-jafaa na huaa
Ho ke be-khud kalaam-e-hasrat se
Aaj 'ghaalib' ghazal saraa na huaa