ai dil vaalo ghar se niklo detaa daavat e aam hai chaand

Ai dil vaalo ghar se niklo detaa daavat-e-aam hai chaand Shahron shahron qariyon qariyon vahshat kaa paighaam hai chaand Too bhee hare dareeche vaalee aa jaa bar-sar-e-baam hai chaand Har koi jag men khud saa DhoonDe tujh bin base aaraam hai chaand Sakhiyon se kab sakhiyaan apne jee ke bhed chhupaatee hain Ham se nahin to us se kah de kartaa kahaan kalaam hai chaand Jis jis se use rabt raha hai aur bhee log hazaaron hain Ek tujhee ko be-mehree kaa detaa kyuun ilzaam hai chaand Wo jo teraa daagh ghulaamee maathe par liye phirtaa hai Us kaa naam to 'inshaa' Thahraa naahaq ko badnaam hai chaand Ham se bhee do baaten kar le kaisee bheegee shaam hai chaand Sab Kuch sun le aap na bole teraa khuub nizaam hai chaand Ham is lambe-chauDe ghar men shab ko tanhaa hote hain Dekh kisee din aa mil ham se ham ko tujh se kaam hai chaand Apne dil ke mashriq-o-maghrib us ke rukh se munavvar hain Be-shak teraa ruup bhee kaamil be-shak too bhee tamaam hai chaand Tujh ko to har shaam falak par ghaTtaa-baDhtaa dekhte hain Us ko dekh ke iid karenge apna aur islaam hai chaand