jalva numaaii be parvaaii haan yahii riit jahaan ki hai

Jalva-numaa.ee be-parvaa.ee haan yahee riit jahaan kee hai Kab koee laDkee man kaa dareecha khol ke baahar jhaankee hai Aaj magar ik naar ko dekhaa jaane ye naar kahaan kee hai Misr kee moorat chiin kee guDiyaa devee hindostaan kee hai Mukh par ruup se dhoop kaa aalam baal andheree shab kee misaal Aankh nasheelee baat raseelee chaal balaa kee baankee hai 'inshaa'-jee use rok ke poochhen tum ko to muft milaa hai husn Kis liye phir baazaar-e-wafa men tum ne ye jins giraan kee hai Ek zaraa saa gosha de do apne paas jahaan se duur Is bastee men ham logon ko haajat ek makaan kee hai Ahl-e-khirad taadeeb kee khaatir paathar le le aa pahunche Jab kabhee ham ne shahr-e-ghazal men dil kee baat bayaan kee hai Mulkon mulkon shahron shahron jogee ban kar ghoomaa kaun Qarya-ba-qarya sahraa-ba-sahraa khaak ye kis ne phaankee hai Ham se jis ke taur hon baabaa dekhoge do ek hee aur Kahne ko to shahr-e-karachi bastee dil-zadagaan kee hai