kal chaudhviin ki raat thii shab bhar raha charchaa tiraa

Kal chaudhveen kee raat thee shab bhar raha charchaa tiraa Kuchh ne kahaa ye chaand hai kuchh ne kahaa chehraa tiraa Ham bhee vaheen maujood the ham se bhee sab poochhaa kiye Ham hans diye ham chup rahe manzoor thaa parda tiraa Is shahr men kis se milen ham se to chhooTeen mahfilen Har shakhs teraa naam le har shakhs deevaanaa tiraa Kooche ko tere chhoD kar jogee hee ban jaa.en magar Jangal tire parbat tire bastee tiree sahraa tiraa Ham aur rasm-e-bandagee aashuftagee uftaadgee Ehsaan hai kya kya tiraa ai husn-e-be-parvaa tiraa Do ashk jaane kis liye palkon pe aa kar Tik ga.e Altaaf kee baarish tiree ikraam kaa dariyaa tiraa Ai be-daregh o be-amaan ham ne kabhee kee hai fughaan Ham ko tiree vahshat sahee ham ko sahee sauda tiraa Ham par ye sakhtee kee nazar ham hain faqeer-e-rehguzar Rasta kabhee rokaa tiraa daaman kabhee thaamaa tiraa Haan haan tiree soorat haseen lekin too aisa bhee naheen Ik shakhs ke ash.aar se shohra huaa kya kya tiraa Bedard sunnee ho to chal kahtaa hai kya achchhee ghazal Aashiq tiraa rusvaa tiraa shaa.ir tiraa 'inshaa' tiraa