lab par naam kisi kaa bhi ho

Lab par naam kisee kaa bhee ho, dil men teraa naqshaa hai Ai tasveer banaane vaalee jab se tujh ko dekhaa hai Be-tere kya vahshat ham ko, tujh bin kaisaa sabr o sukoon Too hee apna shahr hai jaanee too hee apna sahraa hai Niile parbat uudee dhartee, chaaron kuuT men too hee too Tujh se apne jee kee khalvat tujh se man kaa melaa hai Aaj to ham bikne ko aa.e, aaj hamaare daam lagaa Yoosuf to baazaar-e-wafa men, ek Tike ko biktaa hai Le jaanee ab apne man ke pairaahan kee girhen khol Le jaanee ab aadhee shab hai, chaar taraf sannaaTaa hai Toofaanon kee baat nahin hai, toofaan aate jaate hain Too ik narm havaa kaa jhonkaa, dil ke baagh men Thahraa hai Yaa too aaj hamen apna le, yaa too aaj hamaaraa ban Dekh ki waqt guzartaa jaa.e kaun abad tak jiitaa hai Fardaa mahz fusoon kaa pardaa, ham to aaj ke bande hain Hijr o vasl, wafa aur dhokaa sab kuch aaj pe rakkhaa hai Lab par nam kisi ka bhi ho, dil mein tera naqsha hai Ai taswir banane wali jab se tujh ko dekha hai Be-tere kya wahshat hum ko, tujh bin kaisa sabr o sukun Tu hi apna shahr hai jaani tu hi apna sahra hai Nile parbat udi dharti, chaaron kuT mein tu hi tu Tujh se apne ji ki KHalwat tujh se man ka mela hai Aaj to hum bikne ko aae, aaj hamare dam laga Yusuf to bazar-e-wafa mein, ek Tike ko bikta hai Le jaani ab apne man ke pairahan ki girhen khol Le jaani ab aadhi shab hai, chaar taraf sannaTa hai Tufanon ki baat nahin hai, tufan aate jate hain Tu ek narm hawa ka jhonka, dil ke bagh mein Thahra hai Ya tu aaj hamein apna le, ya tu aaj hamara ban Dekh ki waqt guzarta jae kaun abad tak jita hai Farda mahz fusun ka parda, hum to aaj ke bande hain Hijr o wasl, wafa aur dhoka sab kuch aaj pe rakkha hai