log hilaal e shaam se badh kar pal men maah e tamaam hue
— Ibn E Insha
Log hilaal-e-shaam se baDh kar pal men maah-e-tamaam hue
Ham har burj men ghaTte ghaTte sub.h talak gumnaam hue
Un logon kee baat karo jo 'ishq men khush-anjaam hue
Najd men qais yahaan par 'inshaa' khaar hue naakaam hue
Kis kaa chamaktaa chehraa laa.en kis sooraj se maangen dhoop
Ghor andheraa chhaa jaataa hai khalvat-e-dil men shaam hue
Ek se ek junoon kaa maaraa is bastee men rahtaa hai
Ek hameen hushiyaar the yaaro ek hameen bad-naam hue
Shauq kee aag nafas kee garmee ghaTte ghaTte sard na ho
Chaah kee raah dikhaa kar tum to vaqf-e-dareecha-o-baam hue
Un se bahaar o baagh kee baaten kar ke jee ko dukhaanaa kya
Jin ko ek zamaana guzraa kunj-e-qafas men raam hue
'inshaa'-saahib pau phaTtee hai taare Duube sub.h huee
Baat tumhaaree maan ke ham to shab bhar be-aaraam hue