phir shaam huii

Phailtaa phailtaa shaam-e-gham kaa dhuaan Ik udaasee kaa tantaa huaa saa.ebaan Oonche oonche minaaron ke sar pe ravaan Dekh pahunchaa hai aakhir kahaan se kahaan Jhaanktaa soorat-e-khail-e-aavaargaan Ghurfa ghurfa bahr kaakh-o-koo shahr men Daf.atan sail-e-zulmaat ko cheertaa Jal uThaa duur bastee kaa pahlaa diyaa Panchhiyon ne bhee pachchhim kaa rasta liyaa Khair jaao azeezo magar dekhnaa Ek jugnoo bhee mish.al see le ke chalaa Hai use bhee koi justujoo shahr men? Aasmaan par ravaan surma.ee baadalo Haan tumheen kya uDo aur oonche uDo Baagh-e-aalam ke taaza shagufta guloo Be-niyaazaana mahkaa karo khush raho Lekin itnaa bhee sochaa, kabhi zaalimo! Ham bhee hain aashiq-e-rang-o-boo shahr men Koee dekhe ye majbooriyaan dooriyaan Ek hee shahr men ham kahaan tum kahaan Doston ne bhee chhoDee hain dil-daariyaan Aaj vaqf-e-gham-e-ulfat-e-raa.egaan Ham jo phirte hain vahshat-zada sargiraan The kabhi saahib-e-aabroo shahr men Log taanon se kya kya jataate nahin Aise raahee to manzil ko paate nahin Jee se ik doosre ko bhulaate nahin Saamne bhee magar aate jaate nahin Aur jaa.en to aankhen milaate nahin Haa.e kya kya nahin guftugoo shahr men Chaand niklaa hai daaghon kee mish.al liye Duur girjaa ke meenaaron kee oT se Aa miree jaan aa ek se do bhale Aaj phere karen koocha-e-yaar ke Aur hai kaun dard-aashnaa baavare! Ek main shahr men, ek too shahr men Phailta phailta sham-e-gham ka dhuan Ek udasi ka tanta hua saeban Unche unche minaron ke sar pe rawan Dekh pahuncha hai aaKHir kahan se kahan Jhankta surat-e-KHail-e-awargan Ghurfa ghurfa bahr kaKH-o-ku shahr mein Dafatan sail-e-zulmat ko chirta Jal uTha dur basti ka pahla diya Panchhiyon ne bhi pachchhim ka rasta liya KHair jao azizo magar dekhna Ek jugnu bhi mishal si le ke chala Hai use bhi koi justuju shahr mein? Aasman par rawan surmai baadalo Han tumhin kya uDo aur unche uDo Bagh-e-alam ke taza shagufta gulu Be-niyazana mahka karo KHush raho Lekin itna bhi socha, kabhi zalimo! Hum bhi hain aashiq-e-rang-o-bu shahr mein Koi dekhe ye majburiyan duriyan Ek hi shahr mein hum kahan tum kahan Doston ne bhi chhoDi hain dil-dariyan Aaj waqf-e-gham-e-ulfat-e-raegan Hum jo phirte hain wahshat-zada sargiran The kabhi sahib-e-abru shahr mein Log tanon se kya kya jatate nahin Aise rahi to manzil ko pate nahin Ji se ek dusre ko bhulate nahin Samne bhi magar aate jate nahin Aur jaen to aankhen milate nahin Hae kya kya nahin guftugu shahr mein Chand nikla hai daghon ki mishal liye Dur girja ke minaron ki oT se Aa meri jaan aa ek se do bhale Aaj phere karen kucha-e-yar ke Aur hai kaun dard-ashna baware! Ek main shahr mein, ek tu shahr mein