us shaam wo rukhsat kaa samaan yaad rahegaa
— Ibn E Insha
Us shaam wo rukhsat kaa samaan yaad rahegaa
Wo shahr wo koocha wo makaan yaad rahegaa
Wo Tiis ki ubhree thee idhar yaad rahegee
Wo dard ki uTThaa thaa yahaan yaad rahegaa
Ham shauq ke shole kee lapak bhuul bhee jaa.en
Wo sham-e-fasurda kaa dhuaan yaad rahegaa
Haan bazm-e-shabaana men hama-shauq jo us din
Ham the tiree jaanib nigaraan yaad rahegaa
Kuch 'meer' ke abyaat the Kuch 'faiz' ke misre
Ik dard kaa thaa jin men bayaan yaad rahegaa
Aankhon men sulagtee huee vahshat ke jilau men
Wo hairat o hasrat kaa jahaan yaad rahegaa
Jaan-bakhsh see us barg-e-gul-e-tar kee taraavat
Wo lams-e-azeez-e-do-jahaan yaad rahegaa
Ham bhuul sake hain na tujhe bhuul sakenge
Too yaad rahegaa hamen haan yaad rahegaa