dayaar e nuur men tiira shabon kaa saathii ho
— Iftikhar Arif
Dayaar-e-noor men teera-shabon kaa saathee ho
Koee to ho jo miree vahshaton kaa saathee ho
Main us se jhuuT bhee boloon to mujh se sach bole
Mire mizaaj ke sab mausamon kaa saathee ho
Main us ke haath na aa.uun wo meraa ho ke rahe
Main gir paDoon to miree pastiyon kaa saathee ho
Vo mere naam kee nisbat se mo'tabar Thahre
Galee galee miree rusvaa.iyon kaa saathee ho
Kare kalaam jo mujh se to mere lahje men
Main chup rahoon to mire tevaron kaa saathee ho
Main apne aap ko dekhoon wo mujh ko dekhe jaa.e
Vo mere nafs kee gumraahiyon kaa saathee ho
Vo khvaab dekhe to dekhe mire havaale se
Mire khayaal ke sab manzaron kaa saathee ho
Dayar-e-nur mein tira-shabon ka sathi ho
Koi to ho jo meri wahshaton ka sathi ho
Main us se jhuT bhi bolun to mujh se sach bole
Mere mizaj ke sab mausamon ka sathi ho
Main us ke hath na aaun wo mera ho ke rahe
Main gir paDun to meri pastiyon ka sathi ho
Wo mere nam ki nisbat se mo'tabar Thahre
Gali gali meri ruswaiyon ka sathi ho
Kare kalam jo mujh se to mere lahje mein
Main chup rahun to mere tewaron ka sathi ho
Main apne aap ko dekhun wo mujh ko dekhe jae
Wo mere nafs ki gumrahiyon ka sathi ho
Wo KHwab dekhe to dekhe mere hawale se
Mere KHayal ke sab manzaron ka sathi ho