fazaa men vahshat e sang o sinaan ke hote hue

Fazaa men vahshat-e-sang-o-sinaan ke hote hue Qalam hai raqs men aashob-e-jaan ke hote hue Hameen men rahte hain wo log bhee ki jin ke sabab Zameen buland huee aasmaan ke hote hue Ba-zid hai dil ki na.e raaste nikaale jaa.en Nishaan-e-rah-guzar-e-raftagaan ke hote hue Jahaan-e-khair men ik hujra-e-qanaa.at-o-sabr Khudaa kare ki rahe jism o jaan ke hote hue Qadam qadam pe dil-e-khush-gumaan ne khaa.ee maat Ravish ravish nigah-e-mehrbaan ke hote hue Main ek silsila-e-aatisheen men bai.at thaa So khaak ho gaya naam-o-nishaan ke hote hue Main chup raha ki vazaahat se baat baDh jaatee Hazaar sheva-e-husn-e-bayaan ke hote hue Ulajh rahi thee havaaon se ek kashtee-e-harf PaDee hai ret pe aab-e-ravaan ke hote hue Bas ek khvaab kee soorat kaheen hai ghar meraa Makaan ke hote hue laa-makaan ke hote hue Duaa ko haat uThaate hue laraztaa hoon Kabhee duaa nahin maangee thee maan ke hote hue Faza mein wahshat-e-sang-o-sinan ke hote hue Qalam hai raqs mein aashob-e-jaan ke hote hue Hamin mein rahte hain wo log bhi ki jin ke sabab Zamin buland hui aasman ke hote hue Ba-zid hai dil ki nae raste nikale jaen Nishan-e-rah-guzar-e-raftagan ke hote hue Jahan-e-KHair mein ek hujra-e-qanaat-o-sabr KHuda kare ki rahe jism o jaan ke hote hue Qadam qadam pe dil-e-KHush-guman ne khai mat Rawish rawish nigah-e-mehrban ke hote hue Main ek silsila-e-atishin mein baiat tha So KHak ho gaya nam-o-nishan ke hote hue Main chup raha ki wazahat se baat baDh jati Hazar shewa-e-husn-e-bayan ke hote hue Ulajh rahi thi hawaon se ek kashti-e-harf PaDi hai ret pe aab-e-rawan ke hote hue Bas ek KHwab ki surat kahin hai ghar mera Makan ke hote hue la-makan ke hote hue Dua ko hat uThate hue larazta hun Kabhi dua nahin mangi thi man ke hote hue