Kuch der pahle niind se
— Iftikhar Arif
Main jin ko chhoD aayaa thaa shanaasaa.ee kee bastee ke wo saare raaste awaaz dete hain
Naheen maaloom ab kis vaaste awaaz dete hain
Lahoo men khaak uDtee hai
Badan khwaish-ba-khwaish Dah raha hai
Aur nafas kee aamad-o-shud dil kee naa-hamvaariyon par bain kartee hai
Vo saare khvaab ek ik kar ke rukhsat ho chuke hain jin se aankhen jaagtee thiin
Aur ummeedon ke rauzan shahr-e-aa.inda men khilte the
Bahut aahista aahista
Andheraa dil men, aankhon men, lahoo men, bahte bahte jam gaya hai
Vaqt jaise tham gaya hai
Main jin ko chhoD aaya tha shanasai ki basti ke wo sare raste aawaz dete hain
Nahin malum ab kis waste aawaz dete hain
Lahu mein KHak uDti hai
Badan KHwahish-ba-KHwahish Dah raha hai
Aur nafas ki aamad-o-shud dil ki na-hamwariyon par bain karti hai
Wo sare KHwab ek ek kar ke ruKHsat ho chuke hain jin se aankhen jagti thin
Aur ummidon ke rauzan shahr-e-ainda mein khilte the
Bahut aahista aahista
Andhera dil mein, aankhon mein, lahu mein, bahte bahte jam gaya hai
Waqt jaise tham gaya hai