umiid o biim ke mehvar se hat ke dekhte hain
— Iftikhar Arif
Umeed-o-beem ke mehvar se haT ke dekhte hain
Zaraa see der ko Dunya se kaT ke dekhte hain
Bikhar chuke hain bahut baagh o dasht o Dariya men
Ab apne hujra-e-jaan men simaT ke dekhte hain
Tamaam khaana-ba-doshon men mushtarak hai ye baat
Sab apne apne gharon ko palaT ke dekhte hain
Phir is ke ba.ad jo honaa hai ho rahe sar-e-dast
Bisaat-e-aafiyat-e-jaan ulaT ke dekhte hain
Vahee hai khvaab jise mil ke sab ne dekhaa thaa
Ab apne apne qabeelon men baT ke dekhte hain
Sunaa ye hai ki subuk ho chalee hai qeemat-e-harf
So ham bhee ab qad-o-qaamat men ghaT ke dekhte hain
Umid-o-bim ke mehwar se haT ke dekhte hain
Zara si der ko duniya se kaT ke dekhte hain
Bikhar chuke hain bahut bagh o dasht o dariya mein
Ab apne hujra-e-jaan mein simaT ke dekhte hain
Tamam KHana-ba-doshon mein mushtarak hai ye baat
Sab apne apne gharon ko palaT ke dekhte hain
Phir is ke baad jo hona hai ho rahe sar-e-dast
Bisat-e-afiyat-e-jaan ulaT ke dekhte hain
Wahi hai KHwab jise mil ke sab ne dekha tha
Ab apne apne qabilon mein baT ke dekhte hain
Suna ye hai ki subuk ho chali hai qimat-e-harf
So hum bhi ab qad-o-qamat mein ghaT ke dekhte hain