ab zabaan khanjar e qaatil ki sanaa kartii hai
— Irfan Siddiqi
Ab zabaan khanjar-e-qaatil kee sanaa kartee hai
Ham vahee karte hain jo khalq-e-khuda kartee hai
Phir koee raat bujhaa detee hai meree aankhen
Phir koee sub.h dareeche mire vaa kartee hai
Ek paimaan-e-wafa khaak-basar hai sar-e-shaam
Khema khaalee huaa tanhaa.ee azaa kartee hai
Hoo kaa 'aalam hai giraftaaron kee aabaadee men
Ham to sunte the ki zanjeer sadaa kartee hai
Kaisee miTTee hai ki daaman se lipaTtee hee naheen
Kaisee maan hai ki jo bachchon ko judaa kartee hai
Ab numoodaar ho is gard se ai naaqa-savaar
Kab se bastee tire milne kee du'aa kartee hai