ajiib nashsha hai hoshyaar rahnaa chaahtaa hun
— Irfan Siddiqi
Ajiib nashsha hai hoshyaar rahnaa chaahtaa hun
Main us ke khvaab men bedaar rahnaa chaahtaa hun
Ye mauj-e-taaza miree tishnagee kaa vahm sahee
Main is saraab men sarshaar rahnaa chaahtaa hun
Siyaah chashm miree vahshaton pe tanz na kar
Main qaatilon se khabar-daar rahnaa chaahtaa hun
Ye dard hee miraa chaara hai tum ko kya ma.aloom
HaTaao haath main beemaar rahnaa chaahtaa hun
Idhar bhee aa.egee shaayad wo shaah-baanu-e-shahr
Ye soch kar sar-e-baazaar rahnaa chaahtaa hun
Havaa gulaab ko chhoo kar guzartee rahtee hai
So main bhee itnaa gunahgaar rahnaa chaahtaa hun