badan ke donon kinaaron se jal raha hoon main
— Irfan Siddiqi
Badan ke donon kinaaron se jal raha hoon main
Ki chhoo raha hoon tujhe aur pighal raha hoon main
Tujhee pe khatm hai jaanaan mire zavaal kee raat
Too ab tuloo bhee ho jaa ki Dhal raha hoon main
Bulaa raha hai miraa jaama-zeb milne ko
To aaj pairahan-e-jaan badal raha hoon main
Ghubaar-e-raahguzar kaa ye hausla bhee to dekh
Havaa-e-taaza tire saath chal raha hoon main
Main khvaab dekh raha hoon ki wo pukaartaa hai
Aur apne jism se baahar nikal raha hoon main