dar o diivaar ki zad se nikalnaa chaahtaa hoon main
— Irfan Siddiqi
Dar-o-deevaar kee zad se nikalnaa chaahtaa hoon main
Havaa-e-taaza tere saath chalnaa chaahtaa hoon main
Wo kahte hain ki aazaadee aseeree ke baraabar hai
To yuun samjho ki zanjeeren badalnaa chaahtaa hoon main
Numoo karne ko hai meraa lahoo qaatil ke siine se
Wo chashma hoon ki patthar se ubalnaa chaahtaa hoon main
Buland o past Dunya faisla karne naheen detee
Ki girnaa chaahtaa hoon yaa sambhalnaa chaahtaa hoon main
Mohabbat men havas kaa saa mazaa milnaa kahaan mumkin
Wo sirf ik raushnee hai jis men jalnaa chaahtaa hoon main