faqiirii men ye thodii sii tan aasaanii bhi karte hain
— Irfan Siddiqi
Faqeeree men ye thoDee see tan-aasaanee bhee karte hain
Ki ham dast-e-karam Dunya pe arzaanee bhee karte hain
Dar-e-roohaaniyaan kee chaakaree bhee kaam hai apna
Buton kee mamlikat men kaar-e-sultaanee bhee karte hain
Junoon vaalon kee ye shaa.istagee turfa-tamaashaa hai
Rafoo bhee chaahte hain chaak-daamaanee bhee karte hain
Mujhe Kuch shauq-e-nazzaara bhee hai phoolon ke chehron kaa
Magar Kuch phuul chehre meree nigraanee bhee karte hain
Jo sach poochho to zabt-e-aarzoo se Kuch naheen hota
Parinde mere siine men pur-afshaanee bhee karte hain
Hamaare dil ko ik aazaar hai aisa naheen lagtaa
Ki ham daftar bhee jaate hain ghazal-khvaanee bhee karte hain
Bahut nauhagaree karte hain dil ke Toot jaane kee
Kabhee aap apnee cheezon kee nigahbaanee bhee karte hain