haq fath yaab mere khuda kyuun nahin huaa

Haq fat.h-yaab mere khuda kyuun nahin huaa Too ne kahaa thaa teraa kahaa kyuun nahin huaa Jab hashr isee zameen pe uThaa.e ga.e to phir Barpaa yaheen pe roz-e-jazaa kyuun nahin huaa Wo sham.a bujh ga.ee thee to kohraam thaa tamaam Dil bujh ga.e to shor-e-azaa kyuun nahin huaa Vaamaandgaan pe tang huee kyuun tiree zameen Darvaaza aasmaan kaa vaa kyuun nahin huaa Wo sho.ala-saaz bhee isee bastee ke log the Un kee galee men raqs-e-havaa kyuun nahin huaa Aakhir isee kharaabe men zinda hain aur sab Yuun khaak koi mere sivaa kyuun nahin huaa Kya jazb-e-ishq mujh se ziyaada thaa ghair men Us kaa habeeb us se judaa kyuun nahin huaa Jab wo bhee the guloo-e-bureeda se naala-zan Phir kushtagaan kaa harf rasaa kyuun nahin huaa Kartaa raha main tere liye doston se jang Too mere dushmanon se khafaa kyuun nahin huaa Jo Kuch huaa wo kaise huaa jaantaa hoon main Jo Kuch nahin huaa wo bataa kyuun nahin huaa