kahiin to lutnaa hai phir naqd e jaan bachaanaa kya
— Irfan Siddiqi
Kaheen to luTnaa hai phir naqd-e-jaan bachaanaa kya
Ab aa ga.e hain to maqtal se bach ke jaanaa kya
In aandhiyon men bhalaa kaun idhar se guzregaa
Dareeche kholnaa kaisaa diye jalaanaa kya
Jo tiir booDhon kee fariyaad tak naheen sunte
To un ke saamne bachchon kaa muskuraanaa kya
Main gir gaya hoon to ab siine se utar aao
Diler dushmano TuuTe makaan ko Dhaanaa kya
Na.ee zameen kee havaa.en bhee jaan-levaa hain
Na lauTne ke liye kashtiyaan jalaanaa kya
Kanaar-e-aab khaDee khetiyaan ye sochtee hain
Wo narm-rau hai nadee kaa magar Thikaanaa kya