mujhe bachaa bhi liyaa chhod kar chalaa bhi gaya
— Irfan Siddiqi
Mujhe bachaa bhee liyaa chhoD kar chalaa bhee gaya
Wo mehrbaan pas-e-gard-e-safar chalaa bhee gaya
Vagarna tang na thee 'ishq par khuda kee zameen
Kahaa thaa us ne to main apne ghar chalaa bhee gaya
Koee yaqeen na kare main agar kisee ko bataa.oon
Wo ungliyaan thiin ki zakhm-e-jigar chalaa bhee gaya
Mire badan se phir aa.ee ga.e dinon kee mahak
Agarche mausam-e-barg-o-samar chalaa bhee gaya
Havaa kee tarah na dekhee miree khizaan kee bahaar
Khilaa ke phuul miraa khush-nazar chalaa bhee gaya
'ajeeb raushaniyaan thiin visaal ke us paar
Main us ke saath raha aur udhar chalaa bhee gaya
Kal us ne sair karaa.ee na.e jahaanon kee
To ranj-e-naarasee-e-baal-o-par chalaa bhee gaya