pukaartaa hai magar dhyaan men nahin aataa
— Irfan Siddiqi
Pukaartaa hai magar dhyaan men nahin aataa
Ajiib harf hai imkaan men nahin aataa
Bas ek naam hai apna nishaan jo yaad nahin
Aur ek chehra jo pahchaan men nahin aataa
Main gosha-geer hun sadiyon se apne hujre men
Masaaf-e-bai.at-o-paimaan men nahin aataa
Mujhe bhee hukm nahin shahr se nikalne kaa
Miraa hareef bhee maidaan men nahin aataa
Main is hujoom men kyuun is qadar akelaa hun
Ki jam.a ho ke bhee meezaan men nahin aataa
Mire khuda mujhe is aag se nikaal ki too
Samajh men aataa hai eeqaan men nahin aataa