sar e tasliim hai kham izn e uquubat ke bagair
— Irfan Siddiqi
Sar-e-tasleem hai kham izn-e-uqoobat ke baghair
Ham to sarkaar ke maddaah hain khil.at ke baghair
Sar-barahna hoon to kya gham hai ki ab shahr men log
Barguzeeda hue dastaar-e-fazeelat ke baghair
Dekh tanhaa miree awaaz kahaan tak pahunchee
Kya safar tai naheen hote hain rifaaqat ke baghair
Ishq men 'meer' ke aadaab na barto ki yahaan
Kaam chaltaa naheen ailaan-e-mohabbat ke baghair
Ret par thak ke giraa hoon to havaa poochhtee hai
Aap is dasht men kyuun aa.e the vahshat ke baghair