us ki timsaal ko paane men zamaane lag jaaen

Us kee timsaal ko paane men zamaane lag jaa.en Ham agar aa.eena-khaanon hee men jaane lag jaa.en Kya tamaashaa hai ki jab bikne pe raazee ho ye dil Ahl-e-baazaar dukaanon ko baDhaane lag jaa.en Paanv men khaak hee zanjeer-e-giraan hai ki nahin Poochhnaa log jab is shahr se jaane lag jaa.en Aashiqee ke bhee Kuch aadaab huaa karte hain Zakhm khaayaa hai to kya hashr uThaane lag jaa.en Aur kis tarah karen husn-e-khuda-daad kaa shukr Sher likhne lagen tasveer banaane lag jaa.en Kuch to zaahir ho ki hain jashn men shaamil ham log Kuch nahin hai to chalo khaak uDaane lag jaa.en