us ne be kaar ye bahruup banaayaa huaa hai
— Irfan Siddiqi
Us ne be-kaar ye bahroop banaayaa huaa hai
Ham ne jaadoo kaa ik aa.eena lagaayaa huaa hai
Do jagah rahte hain ham ek to ye shahr-e-malaal
Ek wo shahr jo khawabon men basaayaa huaa hai
Raat aur itnee musalsal kisee deevaane ne
Sub.h rokee huee hai chaand churaayaa huaa hai
Ishq se bhee kisee din ma.arka faisal ho jaa.e
Us ne muddat se bahut hashr bapaayaa huaa hai
Laghzishen kaun sambhaale ki mohabbat men yahaan
Ham ne pahle bhee bahut bojh uThaayaa huaa hai
Baanu-e-shahr hamen tujh se nadaamat hai bahut
Ek dil hai jo kisee aur pe aayaa huaa hai