vahshat ke saath dasht mirii jaan chaahiye

Vahshat ke saath dasht miree jaan chaahiye Is aish ke liye sar-o-saamaan chaahiye Kuch ishq ke nisaab men kamzor ham bhee hain Kuch parcha-e-savaal bhee aasaan chaahiye Tujh ko supurdagee men simaTnaa bhee hai zaroor Sachchaa hai kaarobaar to nuqsaan chaahiye Ab tak kis intizaar men baiThe hue hain log Ummeed ke liye koi imkaan chaahiye Hogaa yahaan na dast-o-garebaan kaa faisla Is ke liye to hashr kaa maidaan chaahiye Aakhir hai aitbaar-e-tamaashaa bhee koi chiiz Insaan thoDee der ko hairaan chaahiye Jaaree hain paa-e-shauq kee eezaa-rasaaneeyaan Ab kuch nahin to sair-e-bayaabaan chaahiye Sab shaa.iraan khareeda-e-darbaar ho ga.e Ye vaaqi.a to daakhil-e-deevaan chaahiye Mulk-e-sukhan men yuun nahin aane kaa inqalaab Do-chaar baar nuun kaa elaan chaahiye Apna bhee muddaton se hai ruq.a lagaa huaa Bilqees-e-shaa.iree ko sulaimaan chaahiye