zavaal e shab men kisi ki sadaa nikal aae
— Irfan Siddiqi
Zavaal-e-shab men kisee kee sadaa nikal aa.e
Sitaara Duube sitaara-numaa nikal aa.e
Ajab naheen ki ye Dariya nazar kaa dhokaa ho
Ajab naheen ki koee raasta nikal aa.e
Ye kis ne dast-e-bureeda kee fasl boee thee
Tamaam shahr men nakhl-e-duaa nikal aa.e
BaDee ghuTan hai charaaghon kaa kya khayaal karoon
Ab is taraf koee mauj-e-havaa nikal aa.e
Khuda kare saf-e-sardaadgaan na ho khaalee
Jo main giroon to koee doosraa nikal aa.e