hat ke us rah se jo hai vaqf bas inkaar ke naam
— Jamshed Masroor
HaT ke us rah se jo hai vaqf bas inkaar ke naam
Aao phir sher kahen gesoo-e-dildaar ke naam
Zahr-e-gham le to chalaa jaan ko magar tishna-labee
Jur.a ik aur tamannaa-e-lab-e-yaar ke naam
Rasm-e-ushshaaq hai ye is ko nibhaa.en ham bhee
Varaq-e-jaan ko likhen sho.ala-e-rukhsaar ke naam
Vo kare qatl to andesha-e-dushnaam naheen
Har rag-e-jaan ko karen dashna-o-talvaar ke naam
Shahr-e-paabandee-e-aadaab lagaa hukm koee
Chaak-daaman hai miraa raunaq-e-baazaar ke naam
Chob be-barg sahee daftar-e-shah men lekin
Phuul khilte hee rahenge sabad-e-daar ke naam
Khvaab-zaaron pe rahe dhuup ke manzar paiham
Koee sooraj na jalaa qarya-e-bedaar ke naam
Ham ne 'jamshed' likhe umr ke saare mausam
Us ke honTon pe bhaTakte hue iqraar ke naam