tanhaa har ek rah se guzar jaanaa chaahiye
— Jamshed Masroor
Tanhaa har ek rah se guzar jaanaa chaahiye
Jaise jiye hain vaise hee mar jaanaa chaahiye
Jaane ye dil kaa dard kahaan tak sataa.egaa
Dariyaa chaDhe to us ko utar jaanaa chaahiye
Bujh kar vajood-e-sho.ala sulagtaa hai kis liye
Main raakh huun to mujh ko bikhar jaanaa chaahiye
Aavaargee men kab se guzartee hai raat bhee
Aakhir kabhee to shaam ko ghar jaanaa chaahiye
Ai dosto khaDe ho mire gird kis liye
Koee bataao mujh ko kidhar jaanaa chaahiye
Har jalva-e-jamaal se tang aa chukaa hai jee
Ik roz zindagee se bhee bhar jaanaa chaahiye
'jamshed' sun rahe ho safar kee pukaar kyaa
Toofaan ko yuun na rah men Thahar jaanaa chaahiye