yaad ke dariichon men baarishon ke manzar hain
— Jamshed Masroor
Yaad ke dareechon men baarishon ke manzar hain
Kis nagar kee baaten hain kin ruton ke manzar hain
Ajnabee dayaaron men shauq-e-deed le jaao
Kuchh naheen to har jaanib dilbaron ke manzar hain
Umr ho ga.ee lekin ab bhee hain ta.aaqub men
Us galee se aage bhee titliyon ke manzar hain
Dil kee nam zameenon par chal rahe hain ham kab se
Duur zard peDon par aandhiyon ke manzar hain
Main huun aur samundar hai pesh-e-saa.id-e-seemeen
Dar-pas-e-rukh-e-zarreen parbaton ke manzar hain
Husn-e-kam-qabaa dariyaa aur huaa barahna-paa
Naqsh aaj bhee dil par jangalon ke manzar hain
Kyaa har ek jaanib se chal ke khud tak aayaa huun
Mere chaar-soo 'jamshed' raaston ke manzar hain