ye kis maqaam e tamannaa se dil guzarne lagaa
— Jamshed Masroor
Ye kis maqaam-e-tamannaa se dil guzarne lagaa
Havaa hai jism men ik zahr saa utarne lagaa
Ulajh rahaa hai tiree boo-e-pairahan se badan
Ki phuul halqa-e-baazoo kaa kaam karne lagaa
Havaa-e-dard ne mohlat na dee sambhalne kee
Nuqoosh-e-yaad sameTe to main bikharne lagaa
Vo thaa sitaara-e-rangeen ki maahtaab kee qaash
Huee jo shab to tire lab pe rang ubharne lagaa
Huaa kuchh is tarah insaaf bhee ravaa 'jamshed'
Ki munsifon se dil-e-be-gunaah Darne lagaa