aaj bhi tishnagii ki qismat men
— Jaun Eliya
Aaj bhee tishnagee kee qismat men
Sam-e-qaatil hai salsabeel naheen
Sab khuda ke vakeel hain lekin
Aadmee kaa koee vakeel naheen
Hai kushaada azal se roo-e-zameen
Haram-o-dair be-faseel naheen
Zindagee apne rog se hai tabaah
Aur darmaan kee Kuch sabeel naheen
Tum bahut jaazib-o-jameel sahee
Zindagee jaazib-o-jameel naheen
Na karo bahs haar jaaogee
Husn itnee baDee daleel naheen